Dinsdag 13 Januarie 2015

Die tweede gebod.



Ek is lanklaas so uit die veld geslaan soos toe ek ‘n paar jaar gelede vir ons oudste (en op daardie stadium enigste) ‘n paar boekies gekoop het.

Die boekie gaan oor die Tien Gebooie en verduidelik dit sodat selfs kleintjies dit beter kan verstaan, maar toe ons by die tweede gebod kom slaan my asem weg.

“Jy mag naas My geen ander gode hê nie.” Eksodus 20 vers 3

As kind is hierdie gebod altyd aan my verduidelik as ‘n beeld wat gemaak word wat mense dan aanbid. Ek het altyd gedink ek is redelik veilig wat hierdie gebod aan betref want daar is geen beelde in ons huis wat ons aanbid nie.

Maar hierdie boekie gaan aan om die woord aanbid te verduidelik * “Om iets te aanbid, beteken ons vul ons gedagtes en ons harte daarmee, en dit vat baie van ons tyd.”  Dat ons God bo alles en enige iets anders moet lief hê en dat niks vir ons so belangrik moet wees soos ons verhouding met Hom nie.

Die boekie is bedoel vir kinders, die voorbeelde wat hulle gebruik van dinge wat ons soms belangriker ag as ons verhouding met God is eenvoudig, speelgoed, maatjies, TV…

Skielik slaan dit die wind uit my seile. Hoeveel dinge stel ek self bo my verhouding met God? Ipad, Sosiale media, TV, werk, rekenaar spelletjies, huis skoonmaak.

Ek self slaan sommige oggende Godsdiens oor omdat daar ‘belangriker’ dinge is wat my aandag verg, of ek is net te moeg want ek het te laat gaan slaap omdat ek besig was met dinge wat ek belangriker ag as my stilte tyd.

Wat vul elke dag jou gedagtes? Waaraan spandeer jy elke dag die meeste van jou tyd?

‘n Vriendin op my Facebook bladsy het gister ‘n interesante vraag gevra na aanleiding van onlangse gebeure in die wêreld en ek sluit hierdie blog inskrywing hiermee af: As jy gearresteer word vir ‘n Christen wees, sal daar genoeg bewyse wees om jou skuldig te bevind?

 xxxM

*Gedeelte geneem uit die boek Die Tien Gebooie vir Kleingoed deur Allia Zobel Nolan

Geen opmerkings nie:

Plaas 'n opmerking

Ons is mal daaroor om julle idees oor artikels te lees!